Atal honetan ardoarekin zerikusia duten hainbat gomendio eskainiko ditugu oso era didaktikoan. Hilabete hasieran hainbat aholku emango dizkizuegu:
.
Azaroa-Abendua: ARDO APARDUNA EGOKI NOLA ZABALDU
Azken egunotan, kontsumora bultzatuz, Gabonak hurbiltzen ari direla gogorarazi didate publizitate-kanpainek. Ospakizun horietan, ardo apardunen kontsumoa dituen burbuilen antzera igotzen da. Nire iritziz, ardo apardunak ez dira soilik Gabonetan edo antzeko ospakizunetan edateko, baina irakurleren batek etxekoen eta lagunen aurrean ondo geratu nahi badu, ardo apardunen botilak egoki nola zabaltzen diren azalduko dizuet.

 


Lehenik eta behin kapsula kendu, eta ondoren, muturrekoa askatu behar da (ikus orrialde nagusiko hiztegia). Kortxoak irten eta likidoa isurtzea eragozteko, erpurua kortxoaren gainean ipiniko dugu.
     
 

Ezkerreko eskuarekin tapoiari eutsiko diogu, eta eskuinarekin botila biratuko dugu. Ez da kortxoa birarazi behar, botila baizik. Botila biratzean kortxoari eusten diogula, presioa kontrola dezakegu, eta horrela, bat-batean irekitzea, kortxoa apurtzea eta zarata saihestuko ditugu.

     
 

Esango dut bidenabar EDOZEIN BOTILA ZABALTZEAN ZARATA SAIHESTU BEHAR DUGULA.
     
 
Zerbitzuko kopa flauta erakoa izango da. Zerbitzatzeko, botila esku batekin hartuko dugu erpurua botilaren hondoan dagoen hutsunean sartuz, eta gainerako atzamarrak azpil gisa erabiliko ditugu botilari eusteko. Likidoa kopan isurtzeko, botila makurtuko dugu.
 
     
  Ardoa zerbitzatutakoan, botila izotz-ontzian edukiko dugu izotz eta ur askorekin, 6-8 gradutan egon dadin.
     
  Amaitzeko, logikarako deia egin nahi dut eta gogorarazi nahi dizuet ireki ondoren ardo apardunaren botilaren ahoan koilaratxoa jartzeak ez duela inongo zentzurik.
On dagizuela janak eta kalterik ez edanak.