Orrialde nagusian agertzen den dastatzeko teknika ikasitakoan, “saia zaitez” atal honetan ardo-mota desberdinen ezaugarriak bereizten ikasiko duzue. Aipatzen ditugun botila ardoak lortu besterik ez duzue (ardo eskuragarria gomendatzen ahaleginduko naiz), eta ondoren, ardoa eskuetan duzuela, ordenagailuaren aurrean jarri.
UZTAILA - ABUZTUA
Oraindik ere entzuten da: ardo beltza okelarekin, eta zuria arrainarekin. Baina, berdinak al dira ardo zuri eta ardo beltz guztiak? Testura bera al dute arrain guztiek edo okela guztiek?

Castillo de Monjardin 2003.

- Barrikan hartzitua

-Chardonnay barietatea

-Gutxi gorabeherako prezioa: 6,20 euros.

 

 

 
  Egia da lehenengoak orientazio gisa balio duela, baina uztartzeari dagokionez, edo, hobe esanda, edariaren eta janariaren arteko orekari dagokionez, den-dena subjektiboa da. Hori hainbat arrazoiren araberakoa izan daiteke:
Ardoa edatean norberak duen aldartea.
Urteko sasoia (ez da gauza bera uda ala negua)
Jaki-mota edo nola prestatuta dagoen. (Ez dira inondik inora gauza bera legatza arrautza-irinetan pasatuta edo legatza txingarretan).
Ardoaren konplexutasuna edo gorputza.
Dastatuko ditugun elikagaien (eta asko izutu egingo diren arren, nire iritziz ardoa elikagaia da) orekan edo zaporean eragiten duten bi arlo garrantzitsu izan daitezke honako hauek:
1- Otordua norekin partekatzen duzun. (Niri ez zait berdin sartzen ardoa konpromiso hutsagatik egiten diren otorduetan edo nik aukeratu eta gustura sentiarazten nauen jendearekin egiten ditudanetan).
2- Ordaintzeko prest zauden zenbatekoa. Eta are gehiago gaur egun jatetxeetan ardoa hartzen ari den neurrigabeko prezioa kontuan izanda.
Beno, haria galdu aurretik, deskriba dezadan ardoa:
Ardo hau ezin hobeto doa okela-mota guztiekin, aroma-konplexutasun handia duelako eta ahoan zentzazio asko uzten dituelako. Baina okela ardo zuriarekin jaten ohituta ez gaudenez, ez dugu eskatzen, aldamenekoak zer esango ote duen beldurrez.

KOLOREA: kopa ondo zuri baten gainean 45º makurtzean kolore-xehetasun desberdinak antzemango ditugu.

 
Web guneko orrialde nagusiko eskala-kolorearen parean ipintzen baduzue, urre-kolorekoa dela antzemango duzue, joan den hileko ardoarekin ez dauka inolako zerikusirik. Oxidazio hori barrikan emandako denboraren eragina izan da.

USAIMENA
 
IAroma-intentsitate handia (usain handia du) eta, aldi berean, aroma-konplexutasun handia (aroma-ñabardura asko). Lehenik eta behin zura antzematen da, baina oso ondo orekatuta dago ardoaren aromekin. Fruta-usain atsegina, irasagarra gogorarazten du, lore-usaina (ezti-antzekoak) eta banilla-hondoa.
ZAPOREA
 

Ahoko sarrera lehorra da, ez da karbonikorik antzematen eta ez du uzten inpresiorik mihi-puntan. Aho-igarotzea ezti-antzeko edo glizerikoa da (zentzazio hori antzematen ez dakitenentzat, esan daiteke harmoniatsua eta koipetsua dela, atsegina baina), oso orekatua, azidotasun handi eta freskokoa, mingostasun-ukitu atseginekoa baina ez oso nabarmena. Aho-amaiera oso atsegina du. Zuraren ukitua ez da inola ere nabarmentzen.
LABURPENA
Oso ondo egindako ardoa, eta oso prezio onekoa. Zurak ardoa errespetatzen du. Ez du gehiegizko tanizitaterik, modu berean egindako ardo askotan antzematen denaren aurka.
Beno, irailean ikusiko dugu berriro elkar. Europarrak, kontuz ibili eguzkiarekin eta ondo pasa oporrak (dituzuenok); eta beste hemisferioko orrialde honen zaleok (batzuk bazarete eta), kontuz hotzarekin.